الثانوية : أكون أو لا !

السلام عليكم و رحمة الله و بركاته ..

نرجع للخلف أكثر من سنة ، وقتها كنت في آخر سنة دراسية لي في المرحلة الثانوية ، في هذا الوقت ماكنت اعرف كيف اختار طريق المستقبل ، حيرة .. توتر .. خوف من الفشل او المجهول و فوق هذا هم الدرجات و التحصيلي و القدرات و التسجيل في الجامعة .

احلامي وقتها صارت اشياء عشوائية ، هذا شي طبيعي لاني كنت متعودة على روتين لمدة 12 سنة و فجأة جاء دوري علشان اختار المكان اللي بأثبت نفسي فيه .
بعطيكم فكرة عني في الثانوية شوي 

انا كنت شاطرة من يوم كنت صغيرة ، ماكنت اتعب واجد في المذاكرة الحمدلله و كانت درجاتي زينة لكن مو دايما كنت الأفضل ، بس هذا الشي ما اثر علي وقتها لاني كنت اعرف اني لو تعبت اكثر بكون الافضل ماكانت اهتم في هذا الشي ، عشت حياتي و ذاكرت ما حبست نفسي او ضغطت عليها كنت معتدلة ( بس هذا الشي ابدأ ما ينفع في الجامعة :) 
هنا فرحة التخرج من المدرسة و بداية الطريق المجهول المليء بالمغامرات ..

و بعد التخرج تجي الاختبارات النهائية ( اي احنا نتخرج قبل الاختبارات احفاد نيوتن واثقين من النجاح :)  وقت كرف مضاعف كان الوضع عبارة عن تحصيلي , اختبارات نهائية , تحصيلي .. وقتها كان ضغط شوي .
في النهاية كل شي عدى على خير و طلعت النتيجة كانت جميلة بس انا من الخوف قعدت اصيح و قلت مابيقبلوني و قلبتها عزاء :)

أيش كات احلامي وقتها ؟
ماكانت عندي فكرة واضحة ، في وقت التخرج قلت وين مايقبلوني بروح و سجلت في كل مكان 
بعثة الملك ، cpc ارامكو ، جامعات الرياض كلها مثل  الملك سعود و نورة .. ، جدة ، المدينة المنورة ، مكة المكرمة ، جامعة الملك فيصل و أخيرا جامعة الدمام

كتبت هذه الجملة و انا في ثاني ثانوي .. و سبحان الله كنت اعرف وين بروح :)

المهم نكمل بعد ما سجلت في كل مكان بدأت النتايج تطلع حبة حبة ..

أول نتيجة : جامعات الرياض الكليات الصحية ,, تم رفضي :( الاولوية لاهل المنطقة . 

ثاني نتيجة : جامعة الملك فيصل ,, تم قبولي في تخصص الثورة الحيوانية و الزراعة او شي من هالقبيل ، وقتها تحطمت جدا بعد لانها كانت رغبة 7 ماتوقعت ابدا انها تطلع لي .

ثالث نتيجة : جامعة الدمام ,, تم قبولي مسار علمي رغبة 3 .. هنا فقدت الامل و قعدت اصيح خلاص ؛( 

رابع نتيجة : رفض من cpc ارامكو بس كان بعد فترة طويلة نتايجهم تطول .

لكن .. لا تيأس من رحمة الله ..

بعض الجامعات تطلع 3 دفعات وقت القبول فلو ماطلعت لك الرغبة الاولى تأكد انك تحدث طلبك علشان لا يروح عليك و تترقى لدفعة اللي بعدها ! 

في يوم 15 رمضان وصلت لي رسالة .. تم قبولك في المسار الصحي بجامعة الدمام ، كانت من اسعد لحظات حياتي تم قبولي في الدفعة الثانية اخيرا للرغبة الاولى ^^

كان مطلوب منا نطبع ورقتين بعد تأكيد القبول و دي خطوة مهمة تأكيد القبول ورقة للكشف الصحي اللي بيكون في مستشفى الملك فهد الجامعي بالخبر ، الثانية ورقة اشعار القبول و بتكون مطلوبة وقت اختبارات تحديد المستوى و بتكلم عنهم بعدين ..

في نهاية موضوع اليوم ..

- لا تيأس من رحمة الله ابدا و اعلم ان الله يختار لعبده الصلاح دائما و نعم بالله .

- لا تقول فلان افضل مني او انك ماعندك فرصة ، حاول سوي اللي عليك اما الارزاق بيد الله .

- تأكد جيدا من خطوات التسجيل لانها مهمة جدا و بتكون مسؤوليتك لوحدك .

- سجل في كل مكان لانك ماتضمن المكان اللي بيطلع لك .

- لو سجلت في اكثر من مكان طلع لك قبول فيهم ، تأكد انك تنسحب من الاماكن اللي ماتبغاها و تثبت على مكان واحد ( اتكلم عن الجامعات الحكومية ، لا اقصد الابتعاث او cpc ) 

- اذا تم قبولك و خلصت الاجراءات و كل شي تمام و الحمدلله ، تأكد انك تستمتع بالاجازة و لا تستعجل على الدراسة علشان تكون عندك الطاقة الكافية في بداية الترم ، لكن لا مانع من تطوير نقاط الضعف مثل اللغة الأنجليزية لانها بتفيدك واجد .

- اخيرا ، مافيه شي صعب و لكل مجتهد نصيب ، انت اللي تحدد اذا كنت بتنجح او لا ، توكل على الله و اكرف بكل قوتك :) الحياة الجامعية تطلب طاقة و صبر تختلف تماما عن دلع الثانوي ، لا تستسلم ابدا و حاول تواصل و توصل لهدفك .

انتهيت لهذا اليوم و اي سؤال تفضلوا صفحتي في الآسك  ,, http://ask.fm/sasuga