السلام عليكم و رحمة الله ~
كيف حالكم و رمضان كريم علينا و عليكم و ينعاد بالصحة و العافية
مبروك النجاح يا اطباء و طبيبات المستقبل و بكذا خلصتو سنة ثانية و اقتربتو خطوة قدام لحلمكم و عقبال التخرج ياربفي هذه التدوينة الجديدة بحاول اذكر لكم اهم النقاط و الاختلافات بين سنة ثانية و سنة ثالثة و بعض النصائح و الاشياء اللي ممكن تشغل بالك
ايش هو التغيير اللي حصل في سنة ثالثة ؟
تقريبا نفس وضع سنة ثانية بس بتكون اجمل و ممتعة اكثر لان الدراسة بتتركز على دراسة The body systems يعني مثل مابدأت بالكارديو في نهاية سنة ثانية بتكمل الباقي. بتكون فيه مشاريع جماعية و اسايمنت فردية و بتستمر نفس النظام محاضرات و PBL و Clinical skills و هكذا و نفس وقت الدوام، ممكن الجدول يكون اخف من ناحية عدد المحاضرات لكن في المقابل بتكون دسمة جدا و بتطول فيهم.
هل اقدر ارفع معدلي في سنة ثالثة؟
نعم تقدر ان شاء الله ، هذا الشي يعتمد عليك بشكل كبير لان التحديات و الضغوطات بتزداد و الدكاتره و النظام نفسه يعني انت اللي تحدد هل تستغل تجربتك في سنة ثانية و تحاول تطور نفسك و تتفادئ اخطائك السابقة ، بعد ماعرفت مستواك في السنة السابقة و عرفت طريقة دراستك و اسلوب الدكاتره و تعودت على الدوام.
ممكن تجتهد اكثر و تتعب اكثر لكن تلاحظ ان النتيجة النهائية نفسها ، هنا لا تزعل و تلوم نفسك لان كل مرحلة طبيعي بتكون اصعب من اللي قبلها و اذا حافظت على مستوى جيد هذا بحد ذاته يعتبر انجاز في هذه الظروف الصعبة.
 |
جو مذاكرة لطيف لتخفيف الضغط النفسي |
ايش كان محتوى سنة ثالثة من الناحية الدراسية؟
زي ماذكرت في البداية النظام راح يكون systems يعني بتقعد اسبوعين او 3 على جهاز من اجهزة الجسم و بتدرسها بالتفصيل anatomy, physiology, pharmacology, microbiology, etc
مثلا بتبدأ الجهاز التنفسي بتاخذ تشريحه و بتدخل اللاب تشرحه فعلا و بتاخذ صور الاشعة بأنواعها و طريقه عمله و اهم الادوية و الامراض اللي لها علاقه فيه و العدوات البكتيرية و الفايروسية اللي ممكن تأثر عليه و طريقه اخذ التاريخ المرضي و الفحص و الاجهزة و التحاليل الخاصة فيه و بطبيعة الحال موضوعات PBL لها علاقه فيه لين تخلص الاسبوعين و تختمه و تروح اللي بعده و هكذا
في الفصل الدراسي الاول:
- Respiratory system
- Gastrointestinal tract
- Renal system
- Endocrine system
- Reproductive system
في الفصل الدراسي الثاني:
الوضع بيكون مختلف شوي لان اول 3 اسابيع بتكون عبارة عن مشروع جماعي تحت اشراف قسم طب الاسرة في الجامعة "Fieled training course" هذا المشروع المفروض يكون وقت مفتوح علشان تاخذ نفس قبل ما تدخل في الدوام الحقيقي بتاخذ فيه محاضرات "مو داخلة في الاختبار" بس الحضور عليه درجات و بتسوي مشروع تثقيف صحي و جمع بيانات و تحليلها بإستخدام برنامج SPSS و يختلف الموضوع و التفاصيل كل سنة و الشغل و الاشياء المطلوبة كانت تختلف بين قسم البنات و قسم الاولاد ، البنات كان مطلوب عليهم كتابة Research proposal و عليه درجات و بعدها اقامة الحملة الصحية في احدى كليات الجامعة و في المقابل الاولاد يطلعو شغل ميداني و غير مطلوب منهم Research proposal ياخذو درجته مقابل الحضور فقط :) لكن الفكرة العامة نفسها قروب كبير تقريبا 20 شخص بيشتغلو في مشروع الحملة و بس بتعرف كل شي في وقته بالتفصيل.
 |
جانب من الركن الخاص بمجموعتي |
بعد الفيلد بتاخذ Hematology و بتدخل في Head and Neck
بتاخذ عظام الوجة و الرقبة و الاعضاء اللي فيها و العضلات و طريقه عملهم بشكل سطحي و بعدها تقريبا في المدترم و نقول لك مبروك ختمت كتاب Snell anatomy و صرت كبير و تقدر تبدأ Crossman neuroanatomy و بكذا بتاخذ الدماغ و اهم اجزائه و تفاصيله و وظائفه و بيرجع لك الفيسولوجي بعد غياب طويل بمحاضرات لا تنتهي و بيعقد الفارما حياتك بكمية محاضرات متشابهه متوازية و بتكون تحت ضغط رهيب على اخر السنة لكن كل شي يهون في سبيل تحقيقك لحلمك و المفروض خلاص تكون متعود على حياة الزومبي :)
 |
انا + نيورو = قصة حب |
هل بحتاج كتب سنة ثانية او كتب جديدة؟
احتياجك للكتب يعتمد عليك هل انت اصلا تستخدمها او لا ، بشكل عام اذا كانت عندك كتب لا تتخلص منها لانك بتكمل عليها و ممكن تحتاجها في سنة ثالثة مثل الفيسيولوجي و الاناتومي ، هل تحتاج تشتري شي زيادة ؟ نفس الشي يعتمد على استخدامك بس نصيحة قبل لا تشتري اي شي حمل الكتلاب اونلاين و استخدمه اذا عجبك و حسيت بتستفيد منه 100% اشتريه لا تخسر و تثقل على نفسك بدون سبب.
كيف توزيع الدرجات في سنة ثالثة؟
 |
توزيع الدرجات الخاص بالسنة الثالثة |
بشكل عام نفس اسلوب سنة ثانية عندك 100% "المجموع 1000 في الصورة" علامة موزعة طول السنة
- PBL ترمين كل ترم من 4 ، موزعين قروبات تتغير كل ترم
- "SPC "Student Project Cases بيكون مشروع جماعي "كل 5 او 6 في قروب" خلال الترم الاول و بيكون فيه دكتور مشرف عليكم تجتمعو معاه كل فترة و بيعطوكم موضوع و بتبحثو عنه كل شي كأنه PBL تطلع كل شي تعرف اسباب علاج و هكذا و نهاية الترم تسوي عليه برزنتيشن جماعي
- MED knowledge عبارة عن اسايمنت في الترم الثاني تعريفات " تقريبا فوق ال145 تعريف" 12 صفحة تكتبة بخط اليد، مضمونه درجته ان شاء الله
 |
الكمية الرهيبة الاعجازية بخط اليد :) |
- الاختبارات بالضبط نفس سنة ثانية
- Field exercise درجاته و كمية الطلبات اللي فيه تعتمد بشكل كبير على الدكتور المسؤول عنك
- OSCE نفس اسلوب سنة ثانية اختبار عملي يومين نهاية السنة 8 ستيشنز لكن اللي يختلف انه دسم و فيه واجد مواضيع نصيحتي انك تتدرب من تبدأ الترم الثاني تدرب و لو كل اسبوع مع اصحابك لانك لازم تطبق على احد و يطبق عليك و تشوف اثنين يطبقون بكذا اذا جت الزحمة و الضغط بتكون متمكن من اغلب الاشياء و بتطبقها بشكل بديهي في الاختبار
 |
الباش مهندس اللي تدربت عليه ايام الاوسكي :) |
ايش هو اختبار الVIA ؟
الفايا "Vertical Integrated Assessment" عبارة عن اختبار شامل لكل مادرسته في سنة ثانية و سنة ثالثة و كل سنتين بتختبره و بيكون شامل للي قبله ، طبعا الاختبار عبارة عن pass or fail يعني اهم شي توصل لدرجة النجاح "حل 60% من الاختبار بشكل صحيح" و بكذا تنجح ، مايهم درجتك اهم شي تنجح الاختبار بيكون اختياري 120 سؤال نهاية السنة قبل او بعد الفاينالز بتختبر اختبار تجريبي قبلها بفترة. اما عن طريقة المذاكره هي مراجعه التجميعات من الاختبار التجريبي "بينزلوه لكم الكلية مع الحلول" الى السنوات السابقة و ان شاء الله تعدي من اول مرة. لو قدر الله و رسبت ايش يصير؟ لا تخاف مابتكون نهاية العالم كل اللي عليك انك تعيد الاختبار و الاعادة غالبا تكون قبل بداية السنة الجديدة يعني بعد الاجازة و غالبا يجيبو الاختبار نفسه بالضبط. لكن لو رسبت مرة ثانية "ماصارت ولا مرة من قبل" احتمال تعيد سنة ثانية و ثالثة.
ايش هو حفل تفوق و من اللي يكرموه بالضبط؟
هذا الحفل يشمل جميع طلاب و طالبات الجامعة اللي معدلهم من 4.5 و فوق بعد السنة التحضيرية يعني اذا جبت B+ و فوق يكون ضمن اللي بيكرموهم و بيعطوك مكافأة تفوق 1000 "غيرمكافأة الطالب الشهرية و بتنزل لك في نهاية الاجازة تقريبا.
 |
هرمنا لاجل هذه اللحظة |
كيف استغل الاجازة حاليا بشكل ينفعني السنة الجاية؟
اهم نصيحة انك ترتاح و تطلع تغير جو و ترجع للحياة و بكذا تعبي طاقتك و تستقبل الترم الجاي بكل قوة و حماس للتجارب الجديدة ، لا تفكر بالماضي و تتأثر اذا ماقدرت توصل للمستوى اللي تطمح له قبل ، الان عندك فرصة جديدة و الله مابيضيع تعبك.
لا تقول براجع سنة ثانية لانك مابتحتاجها و بتنسى اصلا
لا تقول بذاكر للسنة الجاية لانك مابتستفيد و مليون شي بيتغير و بتنسى و اصلا اشك ان احد ناوي يسويها فعلا
ممكن تستفيد بالتطوعات سواء في المجال الصحي او غيره
و ممكن تسجل في ورشات عملية او محاضرات او دورات في طرق البحث مثلا او تشترك في بحوث ممكن تسجل تدريب صيفي في المستشفى لا تقول انا ماعندي معلومات و مابستفيد لان مجرد وجودك في بيئة العمل و مشاهدتك لطريقة سير الامور و تعامل الاطباء مع المرضئ في الواقع بيعطيك خبره مميزة عن الموجودة في الكتب و غيرها صدقني مابتنسى كل مرض مر عليك في الواقع و بتبحث عنه اكثر و اكثر و بتكون عندك خلفية عن اشياء واجد عملية و اهم شي تجارب ايجابية و تستمتع بوقتك.
في الختام اتمنى لكم رحلة جميلة مليئة بالخطوات الإيجابية حب نفسك و حب التخصص و حاول تنجح فيه و لا تيأس مهما كانت الصعوبات قدامك لان الله مايعطي عبده الا الصالح له و تذكر بكرة بتخلص بتكون كل الصعوبات اللي مريت فيها ذكريات بالتوفيق جميعا و اراكم قريبا
اي سؤال او استفسار انا موجودة
Twitter: @khadija_0i
Khadija0ahmed.sarahah.com
ليست هناك تعليقات:
إرسال تعليق