بداية جميلة : هكذا نعيش !

مرحبا ...

بداية الغيث قطرة ، خلصت التسجيل و اصبحت طالبة جامعية رسميا و هنا كانت البداية.

و كما يقولون : البدايات دائما جميلة .

بعد كم يوم من القبول وصلت لنا رسالة لأداء الفحص الطبي ، و هذا شرط خاص بالكليات الصحية ، كان الفحص في صباح  شهر رمضان بمستشفى الملك فهد الجامعي ، الفحص كان جدا بسيط و ما اتوقع فيه احد رفض بعد هالفحص ، بعد مارحت ضيعت الطريق لان المستشفى كبير جدا و مباني كثيرة و بعد سؤال اكثر من شخص وصلت للمبنى المطلوب ، كان مطلوب نجيب ورقة الفحص نطبعها من موقع الجامعة + صورة شخصية + نسخة مع اصل بطاقة الأحوال .

كان الدخول مرتب كل شخص اعطوه رقم و بعدها دخلنا على الدكتورة تأخد تاريخنا المرضي و تسألنا كم سؤال عاديين عن صحتنا و بعدها رحنا للممرضة تاخذ عينة دم و نسوي اختبار فحص نظر بسيط ( نظري ضعيف بس كنت لابسه عدسات و الممرضة قالت عادي معاهم ماتفرق )  .

اذا خلصت الفحص تقدر تسافر و تستمتع بالإجازة ، مابتحتاج تراجع الجامعة الا في حالات نادرة  بس من المهم انك تكون متواجد في البلد قبل الدراسة بأسبوعين او اسبوع على الأقل .

على أبواب الدراسة ، و ماذا الأن ؟

باقي اسبوع على بداية الدراسة ، وصلت لي رسالة من الجامعة لأداء اختبار قياس مستوى اللغة الانجليزية .

كيف تستعد لهذا الأختبار ؟

الأختبار عبارة عن قسمين : نظري مكون من 4 أقسام تقريبا 100 سؤال اختياري ، الجزء الأخر عبارة عن محادثة و كانت بعد الأختبار النظري في أول يوم دوام . 

و نصيحة : لا تستعد للأختبار !

ليش ؟ لانه اختبار بسيط جدا و الغرض منه تحديد مستوى اللغة الانجليزية و تقسيم الطالبات الى 3 مستويات ( مبتدئ ، متوسط ، متقدم ) .

الفرق بين كل مستوى في عدد ساعات دراسة المادة و كمية الكتب اللي بيدرسها .

المبتدئ ياخذ 20 ساعة في الاسبوع ( بوك 2 ، 3 ، 4 ) .

المتوسط ياخذ 18 ساعة في الاسبوع ( بوك 3 ، 4 ) و هذا كان مستواي .

المتقدم ياخذ 16 ساعة في الاسبوع ( بوك 4 ، 5 ) .

و في النهاية كل المستويات تختبر الفاينال موحد في بوك 4 .

- لو كانت عندك شهادة أيلتس بدرجة 6 فما فوق قدمها للجامعة قبل الدوام وبكذا تقدر تحذف المقرر كامل و ترتاح -

لا تذاكر روح بمعلوماتك الخاصة علشان تكون في المستوى اللي يناسبك و لا تتعب بعدين  في الدراسة .

انا كنت خايفه من الاختبار و محتاره اذاكر او لا ، بعدين اتبعت نصيحة بعض الاصدقاء و قررت اني ما اذاكر علشان اكون في المكان المناسب لي ، بس في صباح يوم الاختبار توترت و حاولت اراجع بعض الاشياء العشوائية اللي ما استفدت منها اصلا :)

كنت متوترة بسبب الاختبار بس في نفس الوقت متحمسة لانها كانت اول مرة لي في الجامعة .

الاختبار كان في قاعة الفهد الرياضية ( مبنى 30 ) خارج قسم الطالبات فما قدرت اتمشى و اشوف باقي المباني .

كان زحمة بزيادة لان الاختبار كان للمسارين الصحي و الهندسي في يوم واحد .

الاختبار كان سهل و ما يحتاج توتر او استعداد مسبق و نظامه كان زي اختبارات قياس تضليل اختياري ، و في نهاية الاختبار توزعت علينا كتيبات تعريفية بالجامعة .

بعد الأختبار بأسبوع كان يوم التهيئة ، و كان اول يوم لنا في اقسام الطالبات ، قاعة العثمان ..

كانت عندي اسئلة ماتخلص و علامات استفهام واجد ، كنت انتظر يوم التهيئة علشان احصل اجابات لكل هالاسئلة .

طبعا جامعتنا معروفين بالأسلوب المستفز و التهديد و القرارات كلها تجي فجأة و الطلاب اخر من يعلم  :) بس لازم تتعودون عليهم و تطالبون بحقكم من اول يوم .

كانت من ضمن فقرات الحفل مجموعة من الطالبات يحكون لنا عن تجربتهم في السنة التحضيرية و كيف تغلبوا على مخاوفهم و وصلوا لهدفهم في النهاية ، ايضا من ضمن الفقرات تعريف بالمكتبة و نظامها ، اهم المرافق في الجامعة ، طريقة تسجيل المواد ، و في نهاية الحفل يجاوبوا على اسئلة الطالبات .

و في نهاية اليوم كان فيه معرض بسيط للتعريف بالكليات التابعة للمسار الصحي و توزعت علينا كتيبات و منشورات تتكلم عن كل شي له علاقة بالمسار الصحي .

مشوار الطريق للجامعة ...  كان من اصعب الاشياء بالنسبة لي في البداية  و كنت مو متخيلة كيف بقدر اقعد ساعتين في الباص في هالجو طول سنين الدراسة كل يوم ، اول مشوار لي في الباص كان صعب لان الجو حار و مشوارالطريق طويل و مو متعوده و حالتي حالة . 

بس بعدين .. صار مكاني المفضل و افضل ساعتين في اليوم و بيتي الثالث بعد الجامعة :) تعلمت كيف احب و استغل وقتي فيه ، لانه الوقت الوحيد في اليوم اللي بيكون لي بالكامل و اقدر امارس هواياتي فيه ، كل اللي احتاجه جوال + سمعات + هواوي للانترنت + مكان مريح في الطرف عند النافذة و يفضل ان يكون الكرسي الاخير :)

* أخيرا .. نصائح لبداية موفقة :

- لو كنتي بنت ، لا تصدقي اللي بيقولك صرتي في الجامعة و اشتري مكياج و كعب  و دي الامور ، صدقيني بتندمي و بتجي لك ايام تدوامي و شعرك مو ممشط و بالعباة و احيانا بالحجاب بعد :)
- العمل الجماعي مهم جدا ، اختار ناس مجتهدين في مشاريعك و لازم يتوزع الشغل بالتساوي و الكل يشارك .

- حاول دائما التفكير بإجابية مهما كانت الظروف ضدك ، بعدك في البداية و تقدر تبنيها صح .

- انسى دلع الثانوي :) صدقوني هنا بس بتشوفوا منافسة و كرف لازم ما تغفلون عن هدفكم ابدا لان الاماكن محدودة و الكل يطمح بأن يكون الافضل . 

- استمتع بوقتك و حاول تكون لك ذكريات جميلة ، رغم كل شي هنا بتلاقوا اماكن واجد تقدروا تستمتعوا فيها و تغيروا جو في اوقات الفراغ .

- احرص على الصحبة الصالحة ، صديقك ممكن يأثر عليك بشكل كبير فلازم تختاره بعناية ، ممكن هذا الشخص يتسبب لك في خسارة كبيرة بدون ما تنتبه مقابل متعة بسيطة تنساها في يومين .

- اشتري ثياب مريحة ، و اهم شي الجزمة و انتوا بكرامة ، لانكم بتمشوا واجد و بتركضوا بين المباني و القاعات تلاحقوا ورا المحاضرات .

- لا تستعجل على رزقك ، التحضير زين و مفيد بس في البداية لازم تعرف طريقة دكتورك و طريقتك في مذاكرة هذه المادة علشان ماتستغل وقتك و طاقتك في غير محلها .

في النهاية شكرا لزيارة مدونتي المتواضعة ، اتمنى انكم استفدتوا منها و لو قليلا :)